കൂരിയാട്: ദേശീയപാത വികസനത്തിന്റെ ഭാഗമായി കൂരിയാട് നിർമ്മിക്കുന്ന പുതിയ പാലങ്ങളുടെ ഡിസൈനും ഉയരക്കുറവും കർഷകർക്കും നാട്ടുകാർക്കും ദുരിതമാകുന്നു. ആറു വരി പാതയുടെ നിർമ്മാണത്തോടനുബന്ധിച്ച് KNRC നിർമ്മിക്കുന്ന പുതിയ പാലങ്ങൾ കൊണ്ട് യാതൊരു പ്രയോജനവുമില്ലെന്ന ആക്ഷേപമാണ് ശക്തമായി ഉയരുന്നത്.
അറുപതിലേറെ വർഷങ്ങളായി കൂരിയാട് ദേശീയപാതയിൽ നിലവിലുണ്ടായിരുന്ന പഴയ പാലവും പുതിയ പാലവും തമ്മിലുള്ള വ്യത്യാസമാണ് ഇപ്പോൾ ചർച്ചയാകുന്നത്. വെള്ളപ്പൊക്ക ദുരിത പ്രദേശമായ കൂരിയാട് റോഡിന് കുറുകെ അന്ന് നിർമ്മിച്ചിരുന്ന ചെറുപാലങ്ങൾക്ക് ചരിത്രപരവും പ്രായോഗികവുമായ വലിയ പ്രാധാന്യമുണ്ടായിരുന്നു. മഴവെള്ളം സുഗമമായി ഒഴിഞ്ഞു പോകാൻ മാത്രമല്ല, പാടത്തേക്ക് കൃഷിക്കായി വെള്ളം കൊണ്ടുപോകാനും, കന്നുകാലികളെ റോഡ് മുറിച്ച് കടക്കുന്ന അപകടങ്ങൾ ഒഴിവാക്കി പാലത്തിനടിയിലൂടെ സുരക്ഷിതമായി കടത്തിക്കൊണ്ടുപോകാനും അന്ന് ഈ പാലങ്ങൾ ഉപയോഗിച്ചിരുന്നു.
എന്നാൽ, ഇതിനുപകരം നിലവിൽ നിർമ്മിക്കുന്ന പുതിയ പാലങ്ങൾ ഒരു കൊച്ചുകുട്ടിക്ക് പോലും നിഷ്പ്രയാസം കടന്നുപോകാൻ കഴിയാത്തവിധം തീരെ ചെറിയ രീതിയിലാണ് പണിതിരിക്കുന്നത്. മാത്രമല്ല, പാടനിരപ്പിനേക്കാൾ വളരെ താഴ്ത്തിയാണ് പാലങ്ങൾ നിർമ്മിക്കുന്നത് എന്നത് കർഷകരെ ആശങ്കയിലാഴ്ത്തുന്നു. ഇത് മൂലം കൃഷിയിടങ്ങളിലേക്കുള്ള ജലസേചനവും കന്നുകാലികളുടെ സംരക്ഷണവും പൂർണ്ണമായും സ്തംഭിക്കുമെന്നും, പ്രയോജനമില്ലാത്ത ഇത്തരം നിർമ്മാണങ്ങൾ വെറുമൊരു ഔദ്യോഗിക ചടങ്ങ് മാത്രമായി മാറുമെന്നും നാട്ടുകാർ ആരോപിക്കുന്നു.
ഈ വിഷയത്തിൽ നാഷണൽ ഹൈവേ അതോറിറ്റി ഓഫ് ഇന്ത്യയും (NHAI) നിർമ്മാണ ഏജൻസിയായ KNRC-യും അടിയന്തരമായി ഇടപെട്ട് കർഷകരുടെയും പൊതുജനങ്ങളുടെയും ആശങ്കകൾ പരിഹരിക്കാൻ വേണ്ട മാറ്റങ്ങൾ വരുത്തണമെന്നാണ് പ്രധാന ആവശ്യം.
0 Comments